Di developer wey build Lagos Life don raise $500,000 as dem value di company at $10 million, with strong support from di big ogas (CEOs) of Flutterwave, Terra, and Mono.

Omo, see levels! Di brainbox dem behind dat game wey dey burst everybody head right now, Lagos Life (Vatar Inc.), don cash out big time. Dem just pack a whole $500,000 pre-seed money enter pocket, and right now, dem value di company at a whopping $10 million!

Who dey bankroll dem? Big big masquerades like Olugbenga Agboola (Flutterwave CEO), Nathan Nwachuku (Terra CEO), and Abdulhamid Hassan (Mono CEO). Di craziest part of dis whole tori? Dem gather dis money in less than 24 hours! Just like dat, deal close. E choke!

Shalom Rayhamen, Owen Rayhamen, and Anderson Oriahi just start dis P, and dem carry di whole Lagos stress and hustle put inside browser. Inside dis game, you fit form your character, look for job, collect virtual Naira, pay house rent, and even struggle for space inside Danfo bus. Na real life simulator—minus di actual physical slap from agbero.

Since dem launch am, di game don blow scatter. As at October 8, over 4.3 million people from 15 different countries don log in. At one point, 200,000 people dey online at the same time—meaning say traffic even choke for virtual Lagos!

You no need pay one kobo to play am, e free. So how dem take dey make their bar? Dem dey use smartness run adverts and brand partnerships. Musicians fit even pay make dem play dia gbedu for virtual club! Plus, if you wan form big boy for di game, you fit use your real-life money buy virtual Naira. Since dem start, dem don already rake in over $170,000, though we never know whether na pure profit yet.

Shalom say dem go use dis fresh $500k upgrade di game, run massive promo, and hire more hands. Now, di main wahala wey Vatar dey face be say: how dem go keep dis fire burning make players no get tired? Dem gatz maintain di ginger so dat di business go stand gidigba for a very long time!